‘Enna You Know’ tuturuang maging eco-friendly mga batang Pinoy

MAS magiging masaya at relatable para sa kabataang Pinoy ang pag-aaral tungkol sa kalikasan sa bagong Knowledge Channel show na “Enna You Know!”.

Bida rito si Enna (Zavinna Badena), isang curious na teenager na nakakadiskubre ng iba’t ibang problemang pangkalikasan sa kanilang tahanan at komunidad. 

Sa tuwing may tanong si Enna, lalapit siya sa kanyang kuya na si Geo (Benedix Ramos), isang environmental scientist na tutulong sa kanyang maintindihan ang siyensya sa likod ng mga problema at ang mga simpleng solusyong maaaring gawin araw-araw. 

Sa pamamagitan ng kanilang kuwento, tuturuan ng “Enna You Know!” ang young viewers tungkol sa pagtitipid ng enerhiya, environmental sustainability, at iba pang eco-friendly habits na makatutulong sa kalikasan. 

Binuo ng Knowledge Channel Foundation Inc. (KCFI) ang four-episode series katuwang ang Schneider Electric Foundation, Schneider Electric Philippines, Makesense Asia, at Department of Education (DepEd). 

Bahagi ito ng “Project Shaping Energy,” na naglalayong palawakin ang kaalaman ng mga public high school student tungkol sa enerhiya at sustainability. 

Nakaayon din ang programa sa Science curriculum para sa Grades 9 at 10. 

Ayon kay KCFI Vice President Edric Calma, pangmatagalang investment ang paggawa ng mga educational program para sa kabataan. 

“Ang investment po sa education, katulad ng mga ginawa nating video lessons na ito, ay makabuluhan at sustainable. Taun-taon, ilang mga bata ang matututo ng science nang maayos at magmamahal sa ating kalikasan dahil sa mga videos na ito,” aniya. 

Kasabay ng launch ng programa, namahagi rin ang KCFI at mga katuwang nito ng educational materials na naglalaman ng lahat ng episodes sa mga Science teacher mula sa DepEd Schools Division Office of Rizal. 

Napapanood ang “Enna You Know!” tuwing Miyerkules, Huwebes, at Linggo sa Grade 9-10 block, 4 p.m., na may replay ng 10:40 p.m. sa DepEd TV powered by Knowledge Channel. 

Available nationwide ang DepEd TV sa digital free TV sa BEAM Ch. 31 at SBN Ch. 21; direct-to-home satellite sa Cignal, GSat, at SatLite; at cable sa SkyCable, SkyTV, Cablelink, at mga operator na miyembro ng Philippine Cable and Telecommunications Association. 

The post ‘Enna You Know’ tuturuang maging eco-friendly mga batang Pinoy appeared first on Bandera.

Source: The Daily Feed