Sofronio Vasquez uuwi na ng Pilipinas, hirit ng fans: ‘Sana mag-show ka!’

PHOTO: Facebook/Sofronio Vasquez

PINASABIK ng “The Voice” champion na si Sofronio Vasquez ang maraming Pinoy fans sa kanyang latest social media post.

Ang exciting news kasi, uuwi na sa ating bansa ang Pinoy singer!

Ibinandera niya ‘yan mismo sa kanyang Facebook page na ang caption ay, “Coming back to [Philippine flag emoji] very soon. Takits!”

Wala siyang ipinost na petsa kung kailan siya mismo darating sa ating bansa, pero sa naunang interview niya sa “The Pod Network,” sinabi niyang January 5 siya babalik ng Pinas.

Baka Bet Mo: Sofronio inalala ang advice ni Rey Valera: ‘Ikaw gagawa ng sarili mong swerte’

Kung matatandaan, nangako si Safronio na ang una niyang bibisitahin ay ang noontime show na “It’s Showtime.”

Ito ay matapos siyang ma-interview ng mainstay hosts ng show na kung saan ay lubos din siyang nagpasalamat at ipinagmalaki ang pagiging contestant noon sa “Tawag ng Tangahalan.”

Sambit niya, “Proud ako na nagsimula ako sa ‘Tawag ng Tanghalan’ at ang ‘It’s Showtime,’ ang unang naniwala sa akin.”

Nitong buwan lamang nang tanghaling grand winner si Sofronio sa ika-26th season ng The Voice USA.”

Dahil sa kanyang achievement, siya ang kauna-unahang Filipino at first Asian na nakapag-uwi ng nasabing titulo sa naturang international singing competition.

Si Michael Bublé ang naging coach niya na talagang napaiyak nang masaksihan ang winning moment ng Pinoy artist.

Tinalo ni Sofronio ang kanyang kasamahan sa Team Bublé na si Shye, Danny Joseph ng Team Reba, Jeremy Beloate mula sa Team Snoop at Sydney Sterlace ng Team Gwen.

Bilang champion, mag-uuwi si Sofronio ng $100,000 o P5.8 million cash prize, pati record deal with the Universal Music Group kung saan nakakontrata ang mga international artists tulad nina Taylor Swift, Alicia Keys, Harry Styles, Adele, at marami pang iba.

Taong 2022 nang magtungo siya sa Amerika para ipagpatuloy ang kanyang singing career matapos pumanaw ang ama.

Noong 2016 naman nang unang sumali si Sofronio sa “Tawag ng Tanghalan,” ngunit hindi na siya nakapasok sa finals.

Nag-compete ulit siya noong 2017 at umabot lamang sa semifinals.

Taong 2019 nang bumalik siya sa noontime show upang sumali naman sa “TNT All-Star Grand Resbak” kung saan siya ay nagtapos bilang grand finalist.

The post Sofronio Vasquez uuwi na ng Pilipinas, hirit ng fans: ‘Sana mag-show ka!’ appeared first on Bandera.

Source: The Daily Feed